السلام عليكم ورحمة الله وبركاته
الله أكبر 9×
ألله أكبر ولله الحمد . الحمد لله الذي جعل هذا اليوم عيدا للمسلمين وشعارا للاسلام. أشهد أن لا اله الا الله الملك الحق المبين وأشهد أن محمدا عبده ورسوله صادق الوعد الامين. اللهم صل وسلم علي نبي الهدي والرحمة المبعوث بالكتاب والحكمة سيد المرسلين وخاتم النبيين محمد صلي الله عليه وسلم وعلي اله الكرام وأصحابه المختار وأتباعه أجمعين. أمابعد فقال الله تعالي لقد خلقنا الانسان في أحسن تقويم ثم رددناه أسفل سافلين.
فيا عباد الله أوصيكم ونفسي بتقوي الله وطاعة الله ورسوله لعلكم تفلحون.
Allah Akbar 3 x Wa Lillah al-Hamd
Al-hamdu Lillah wa Syukrillah, teppaja risompa nenniya ripuji puang Allah ta’ala, pappadatosa puang Allah taala teppaja napaturung pammasena nenniya pakkamasena lao ri ikkeng maneng, nasabari natopada engkaki makkatudangeng ri ongrongngewe nasaba seddi niat nenniya akkatta iayanaritu sekira-kira maeloki pasilennerengngi pakkasiwiatta lao ri puang Allah taala. Na riappujiang tona ritu ri puang pangcajiengngi sininna alangnge, engrengnge riala toni ritu passompung rio rennu rigau engkata pada pasilennerengngi sempajang allepereng pittaraae iyae essoe.
Salawa nenniya papasalama masse ripangolo lao ri nabikkeng Muhammad Saw, nabi mallebangnge apammasengenna ritu ri sininna alangnge. Nasabari nakiengkana pada makkacoeriwi ritu apatiroanna nenniya pada makkatenni masse ritu ri agamana iayanaritu agama sellengnge iya pura napapolengekki ritu. Nakisalewangeng tona ritu pole ripettanna lino wanua paccobae lipumpewang sumange nappasajang rennu. Narimakkoannanaro aja tapabombangngi arota mita anu ritakkajenneki ri lino, toddo puli masse’i nasaba uli tessape juku temmalala nainappa ritettuang ri laleng ati kaminang marilelengnge, iayanaritu istiqama’e makkatenni ri kitta’na Allah ta’ala nenninya haddese essana nabikkeng Muhammad saw.
Allahu Akbar 3x Wa Lillah al-Hamd
Mappakkoniro suara takbir dan tahmid pappuji-puji lao ripuang Allahu taala, ripakkoling-koling “Allahu Akbar 3x Wa Lillah al-Hamd” samanna napakedo maneng lino lolong lise, riuh gemuruh menusuk sukma, alun beralun menusuk rasa. Nainappa ripakkoling paimeng “Allahu Akbar 3x Wa Lillah al-Hamd” ripadecengi engkalingana nainappa rirasakang rilaleng ati kaminang marilalengnge, namajeppu rirasakangngi makkeda temmakaharo pale lebbina nennia tanrena pappuji-pujie iyyaewe. Iyyanae wettue saisanna tauwwe denaulle tahangngi essibabauna rilaleng atinna, denaulle tahangngi wae matanna, nasaba naengngerangmanenni siajing sellenna iya mabelae pole ripakkita matanna, silessurenna rilaleng sompereng, ana-ana’na rilaleng pallawangeng, tau matuanna iyya de’e nasibawa malleppe rialalenna iyya essoe pittaraE nasaba lesuni ripammasena puang Allahu taala, Inna Lillahi wa Inna Ilaihi Rojiun. Mompo manenni paimeng ripangngeratta, samanna engka manengngi talleng riolona matatta. Narimakkuannanaro upeppaha tapunnai idi iyyae essoe engkaki pasilennerengngi sempajang alleppereng pittarae nasibawai keluarga yang lengkap. Nasaba de nacedde silessuretta iyyae essoe maelo mewamanenngi siraga-raga nennia sisompung rennu keluargana, naikiya, lisuni ripammasena tomatuanna iyarega ana’na gangkanna tudangmi bawang cannunnu naitti wali wae matanna mengngerag manengngi toripojinna.
Narimakkuannanaro, rilalenna iyyae wettu rio rennuE nennia wettu asennangenge, aja laloki napatakkalupa lao ritana rionroiyye makkallecca, nennia langi rijujungnge, padalaonimai tapada pallebbangngi asennangetta nennia pasisompungngi rio rennutta lao riiyya manenna silessuretta, Nasaba engkamupa saisa pole risiajing selletta iyae essoe, mappamula mompona fajjarengnge, naengkalingana takkabbere, natudang cannunnu naitti wali wae matanna, nassappuru arona, napasabbarai atinna nawa-nawai totona teppaulle pappada ikkeng maneng iyae essoe. Nawa-nawai bakkaweng bola tennaulle sambei, pakeang carepana tennaulle sullei, anre sisanru’na tennaulle pasirapiwi. Koettopa paimeng saisa pole risiajing seletta engkae beu-beu, aja lalo talupai nasabari namalo atinna, namalucca pappineddingna, tawerengngi sekke sarekkoammengnge nasisompung sumangenna, tawerengnge ada makessing sarekoammengngi nalai pakkuru sumange, nasabari napada engka siporio sipurennu iyae essoe. Attumanniki pole riadanna puang Allah taala mekkeda :
أريت الذي يكذب بالدين فذلك الذي يدع اليتيم ولا يحض علي طعام المسكين
Bettuanna : Mupahamuga tau massakarengngengi agama sellengnge, iayanaritu tau tunai-tunai ana beu-beuwe nenniya tau de’e nappanre tau kasi-asi.
Allahu Akbar 3 x Wa Lillah al-Hamd
Sinninna umma selleng engkae hadere
Iyyae essoe, esso kemenanganna ikkeng tomateppe’e pura mappuasangngi uleng ramalang. Nasaba siuleng ittana, ritahang aleta pole ri dekkae, rilupue engrenge pole risininna gau-gau salae, ada salae, kedo salae nenniya iyamanenna weddingnge solangi nenniya lolloi appalanna puasata, sarekkoammengngi engkaki pada mitau lao ri puang Allah taala nenniya mannini pole ri pappesangkana. Sitongeng-tongenna puasae tenniya makkeda ritahangngi aleta pole rilupue nenniya dekkae simata, naikiyya hakekanna iayanaritu musui iyarega kendalikangi hawa nafsue. Nasaba iayana hawa nafsue musu kaminang maraja risesena ikkeng rupa tauwe. Ri wettu nabitta Muhammad saw lisu pole ri perang Badar, makkedai nabitta : رجعنا من الجهاد الأصغر إلى جهاد الأكبر (bettuanna : lisuni pole ri musu mabaiccue lao ri musu marajae). Nakkutanana sahabae makkeda : engkamupagaha musu kaminang maraja pole ri musue ri Baddareng e… surona Allah ta’ala ?, makkedai nabitta “engka” iyanaritu musui hawa nafsue (جهاد النفس). Narimakkaannanaro aja laloki engka maelo napakawase-wase hawa nafsutta, tainringi hawa nafsutta lao ri laleng naporioe puang Allah taala, namabela pole appatakabelimpelinna setange. Narimakkoannaro tettongenni kowa alepu, narialepuki maneng sininna gau salae, narisampeang sininna ampe kedo nacacca puangnge, nainannapa topada makkatenni ri apatiroanna agamata iayanaritu kitabullah wa sunnaturrasul. Timpa’toni koritu bitara temmenu’e, natopada makkalejja ri salangka bitara’e, nariattuppu ri awo lagadinge natopada tudang riasenna papeng ulawengnge, nasaba tuntu’i rio simatana puang Allah ta’ala.
Allahu Akbar 3 x Wa Lillah al-Hamd
Upepaha nenniya alabappaha ri punai ikkeng pura mampuasangi uleng ramalang nasibawai teppe simata lao ri puangnge, namusui hawa nafsuna, nakendalikangi alena pola riakkelo-kelona hawa nafsunna nasabari namacawe pammasena puangnge namabela pole ri paccallae. Tau lolongeng pammase nenniya nabbarakkaki puasa, mannesai ri telluE passaleng, iayanaritu :
1. Napahangi alena makkeda saisanni ripancajinna puang Allah taala. parellu kipahang madeceng makkeda pole ri siagae egana pura nappancaji puang Allah ta’ala, ikkenna rupa tauwe kaminang makessing ancajingenna nenniya kaminang ripakalebbi. Padatosaha pura napannesa puang Allah ta’ala ri laleng adanna ri gau makkedana : لقد خلقنا الانسان في أحسن تقويم ثم رددناه اسفل سافلين (Bettuanna : pura upancajiwi ritu rupa tauwe nasaba sikessing-kessinna angcajing, nainappa utaroi ri onrong kaminang mariawae). Narimakoannaro aja laloki engka maelo solangi akessingetta nenniya alebbiretta nasaba sala gau – gau salah, salah kedo – kedo salah, engrenge gau-gau iya balakang pakatunai alebbiretta iya pura nawerekki puangnge. Uppanna-uppanna rupa tauwe naturisi akkelo-kelona hawa nafsunna, de nakendalikangi elo talliwa-liwanna hawa nafsunna, majeppu tau makkowaero ri taroni ri ongrong kaminang mariawae. Nasaba tau makkoero napahallalai harangnge, napaharangi hallalae, hallala hallulu nalulu maneng, malomoni lesseri janji, narusai assedingengnge nasabari namaroca abbanuangnge, namasolang akkalinoange. Makkedaai passulesanana Ara’e : طوبي لمن كان عقله أميرا وهواه أسيرا وويل لمن كان هواه أميرا وعقله أسيرأ. (Bettuanna : upeppaha napunnai tau pangcajiengngi akkalenna pemimpin nenniya acilakappaha nappunai tau pancajiengi hawa nafsunna pemimpin ri watang kalena).
2. Napahangngi mekkedda namajeppunna alena (rupa tauwe) sebagai khalifah iyarega pemimpin. Pura kipahang madecenni makkeda tungke-tungke rupa tauwe mancaji pemimpin manengngi, natungke-tungke seddie pemimpin riellauwi pertanggung jawabanna matti ri esso rimunri ri olana puang Allah taala. Makkedanna nabitta ri laleng haddesenna : كلكم راع وكلكم مسئول عن رعيتكم (bettuanna : tungke-tungke iko mennang pemimpin maneng, natungke-tungke seddie pemimpin bertanggung jawab maneng lao ri anu napimpingnge). Akkattanna ritu degaga tau de nancaji pemimpin, nadetoga seddi pemimpin leppe pole ripakkutanana puang Allah ta’ala. Seddie kepala kampong ritanae matti ripuang Allah ta’ala pekkogai pallao rumana pabbanuae, pekkogai carana pimpingi raya’na, pekkogai carana jellokangi adecengenna masyarakanna, narilainnaro. Seddie kepala rumah tangga ritanai ri puang Allah ta’ala pekkogai carana bimbingngi wijanna gangkanna mangcaji ana’ patuju iyanaritu ana malebu namalebu ittello, macaca na macaca jarung, polei napapole nyameng kininnawa, laowi nataro sengereng, makkeguna lao ri agamana nenniya lao rikamponna. Engrenge paimeng tungke-tungke ikkeng rupa tauwe ri tanaiki ri puang Allah ta’ala pekkogai carata pimpingi watakkaleta, kendalikangi hawa nafsutta sarekkoammengngi natuling matturu lao ri parentae nannini pole ri pappesangkae. Naparengerangiki puang Allah taala rilaleng akorangnge makkedanna ; لقد زرعنا لجهنم كثير من الجن والانس لهم قلوب لا يفقهون بها ولهم اذان لا يسمعون بها ولهم أعين لا يبصرون بها أولئك كالانعام (bettuanna : ripamolangi api naraka nasaba maega pole ri rupa jinge nenniya rupa tauwe iayanaritu riwereng ati (akkaleng) naekiyya de napakkegunai atinna, riwerengi parengkalinga naekiyya de nappakkegunai parengkalinganna, riwerengi pakkita naekiyya de napakkegunai pakkitanna, tau mappakuwaero padai laona olokoloe). Iyakkeppaha akkalenna napakkegunai makkalengi nenniya gau bawangngi padana rupa tau. Parengkalinganna napakkegunai maengkalinga ada-ada salah iyarega bicara-bicara salah, koettoparo pakkitanna napakei kamata-mata gangkanna katama-tama. Iyamanennaro matti mancaji pamolanna api naraka. Narimakkoannaro laoni mai natopada pimpingi watakkalena padamoi engkae lesang koettoparo iya tellesangnge. Tapimpingngi limata aja nasembarang karawa, tapimpingngi ajeta aja nakajokka-joka, tapimpingngi uluta aja nakacuru-curu, tapimpingngi timuta aja nakatimu-timu, tapimpingngi matata aja nakamata-mata, tapimpingngi atitta aja namesere ati, engrenge ri lainna toparo.
3. Napahang madecenge alena makkeda atai pole ripuang Allah ta’ala. Nakipahang medeceng makkeda ikkeng atanna puang Allah ta’ala diparentaiyakki massompa lao ri alena. Pada toha narampe ri laleng akorangnge : وما خلقت الجن والانس الا ليعبدون (bettuanna : de uapancajiwi rupa jingnge nenniya rupa tauwe sangadinna massompa lao riya). Narekko kipahanni onrotta selaku ata pole ri puang Allah, ajanna napakaatai alena lao risaliwenna puangnge nenniya aja tona ripuatae padatta ata, nasaba seddimi bawang engka atanna iayaritu puang Allah ta’ala. Degaga wedding puatai atanna puang Allah ta’ala sangadinna alenami bawang. Makkotoparo paimeng narekko napahangngi alena ata, majeppu napahang toni ritu makkeda de gaga puang puata sangadinna puang Allah ta’ala iya pancajiengi sininna alangnge. Narimakkoannaro parellu kipahang medeceng makkeda iya ateka essae, ateka ritarimae iayanaritu ateka pannessaengngi atangenna atae nenniya apuangenna puangnge. Nasaba iyyanae mancaji sabbi ri ada tongengnge gau ritarimae nenniya ateka essae, ada tenrisabbingie gau tekketimbangen ateka marusa’. Ateka marusa’e manessai rigau assisakkareng ada’e. Naiyya ada assisakkarengnge gau tessilolongen ateka ri mallinrungnge, tessiomporeng pammase pole ri puang sewwa’e. gau rimanessae loroseng ada tongeng, tongeppi mupuadai, mumalempu taro gau muwakkang pesona. Ada singkeru ri mannessae, ati tellong mappattongeng, tubu makkeda sadda bate-batte pappijeppue. Paddisingeng pappijeppue leteng singkeruangnge rupa gau alettukeng passompa. Assompaki naluru mappesona, mutonang jasang pettu ri laleng ateka, naletei pammase nenniya pakkamesena puang sewwae. Atekappa mappannessa malara tessiwawana ulaweng cere ri laleng buwa lompengeng ri majeng. Aja tapabombangi atekatta, ada tongenge pole ri puangnge الحق من ربك فلا تكونن من الممترين .
Allahu Akbar 3x Wa Lillah al-Hamd
Sininna umma selleng malebbiki engkae hadere
Riolo denapa ripaccappui katobbae, maeloka pangolongangi dua tellu pappasenna to panritata ri makkedanna ;
1. Sabbarakko tuttung pare’mupogau passurong muniniri pappisangka. Ampe madecengngi appakatuna alewe asugirengngi appasikuwae. Sukkuru’e singkeruang masse attunru-tunrue atemmangingngireng. Riyoe teppettu rennu. Ikhlas appasimata-matae ..tentuang. pesonae. Jasang’pettue sengkeruwangnge. Deceng kapang ripuwangnge tonangeng salewangenna watakkale saupole sumange’e. limbang ri maje’tana siwalie.
2. Seroi bujung temmettie naenceng pulana paddissengemmu. Atutuwi lampu teppeddewe nattappa pulana teppe’mu. Bole-bolei tonangeng malessie namannennungeng parengngerammu.
3. Amala’ paddissengemmu, teppe tentuammu, appassewwang nyawa pakkasiwiang passompamu, atabbuttureng pakkitammu ri rupanna Qa’ba qaosaeni pannessaengngi akatangenna atae riaapuwangenna Puwangnge.
4. Palebbani koromai sompe’na sampang teppe’e, naripabbalabangi nasaba amala shaleh, namattipi insya Allah topada mallabu ri akhera nasaba ati caddio rennu pulana. Mangolo temmaboko sitangareng puanna, carilla-killa ri nyili pada uleng tepu ri tingarae caiyyana. Limbang ripammasareng tenri kira-kira toni ri letenge rimannippi, nauttama risuruga pammasena Allah ta’ala.
Walai paccappureng ada:
Senge’ka rilabbuE ubali senge’ki rigollaE, tosipaggalelu ri kalukuE, tosiruntu rionde-onde. Senge’ka simata jarung ubali senge’ki sipuppureng lino.
Narekko massarakki bajaE sangadiE, napoleiki uddani congaki ribitaraE tosiduppa mata riketengngE. Engkatu bunga-bunga sitakke utanengakki, narekko makelle’I daunna tabollorangmanika kasi nasaba wae mata. Sarekkoammnengi engka mancaji passengereng pallawa uddani.
بارك الله لي ولكم في القران الكريم ونفعني واياكم بما فيه من الايات والذكر الحكيم.
KHUTBAH KEDUA
ألله أكبر ×7 الله أكبر ولله الحمد
ألحمد لله , الحمد لله حمدا كثيرا كما أمر , حمدا يوافي نعمه ويكافي مزيده ربنا لك الحمد كما ينبغي لجلال وجهك وعظيم سلطانك , وأشهد أن لا إله إلاّ الله الملك الحق المبين , وأشهد أن محمدا عبده ورسوله خاتم الأنبياء والمرسلين .
أللهم صل وسلم وبارك على سيدنا محمد وعلى آله وصحبه والتابعين . إن الله وملائكته يصلون على النبي يا أيها الذين آمنوا صلوا عليه وسلموا تسلما .
اللهم صل على سيدنا محمد كما صليت على سيدنا إبراهيم وبارك على سيدنا محمد كما باركت على سيدنا إبراهيم في العالمين إنك حميد مجيد . اللهم ارض عن خلافاء الراشدين أبي بكر وعمر وعثمان وعلي وسائر الصحابة أجمعين .
Pada laoni mai pangolo madecengi ati mapaccitta lao ripuang sewwae, rimakkedatta :
Ee…Puang, tapalaloka pangoloi atikku nennia watakkaleku lao riolo arajatta puang, degaga akkatta laing sangadinna maeloka pannessai majeppu iyya toripancajitta’ka paung nennia degaga elo ulleko sangadinna elo ulleta puang. Tenriulle bilangngi atassalakku nennia atakkalupakku iyya pura maddioloe, nassabari namalucca atikku nasaba engkaku salaiwi apatiroatta puang. Namajeppu sitonge-tongenna masiri matane’ka pangoloi ale’q riolo alebbiretta puang, malemma pappeneddikku mapeca kabuttukku, pangoloi atikku, makka’I duae limakku, nennia suju riolota puang sarekkoammengi tapalaloka marellau lao ri’idi puang.
Naikiya….Ee…Puang, narekko denakko riolota upangolo alusukku nennia kassara’ku, majeppu denagaga angolokku laingnge puang, nasaba pura utenttuanngi rilalenna ati kaminang marilalekku makkeda de gaga adele riase’na adele’ta puang, degaga akuasang riase’na akuasangetta puang nennia degaga pappuji riasenna pappujitta puang, degaga pammase riasena pammaseta puang, degaga pakkamase riasena pakkamaseta puang. Narimakkuannaro taddampengekka puang sarekkoammengngi leppe’ka pole ricappa’na carita ja’e, nassabari nonnoka riawana pettu peddennuangnge. Iyyatonaro nassabari naengkaka mangolo riolo arajatta puang sarekkoammengni tatarimai angolokku lao riolo alebbiretta puang. Nasaba idi’mi bawang puang maraja addampeng namaraja akkamase.
Ee…Puang…Purani wola peri’e nennia sussae ripetta kape’e, naikiya gau mannessa, majeppu pettang kape’na lino denaulle kalai pettang kape’na laleng kuburu, risesena tau takkalupae sukkuruki pappedalleta puang lebbi-lebbipi risesena tau iyya massakkarengengi puang.
Sewwa wettu matti gau mannessa riolai laleng amatengnge, riuttamaki calori’na kuburu’E, tajengngi esso paccappurengnge rilino wanua cinampe’E, naikiya :
Tapakarajangengga addampeng puang, nasaba cakka’na annessana amatengnge riseseku naikiya tennassabari natatamba teppe’ku, tennassabari natattamba paddisengeng nennia amala madecekku, naikiya iyakkeppaha deuwissengi aleku, takabboro’ka nennia takkalaupaka sukkuru. Padahal, pura riwerengnga dalle nennia pappenyameng temmaggangka naikiya deusukkurukiwi puang.
Tawerengnga mata, iyyae mataE Tania appunnaku puang naikiya simata-mata appunnatta tapinrengika, narimakkuannanaro sitinajai upakkeguna matakku molai apatiroatta puang, bacai kitta malebbita puang, naikiya taddampengekka puang nasaba deupakkegunai pakkitakku lao rilaleng tapurioe pung. Maladdeka takkalupa nennia tappasala puang, nasabari tekkeangke’I atuo-tuongekku rilino puang.
Tawerengnga parengkalinga, iyyae parengkaligakku Tania appunnakku, naikiya simata-mata appunatta puang. Sitinajai upakkeguna parengkalingakku lao calingeki pangaja madencengnge ri masigi’E, mengkalinga lappa-lappana baca akorangnge, naikiya takkalupaka nenniya tappasalaka puang deupakkegunai parengkalingakku lao rilaleng riota puang.
Tawerengnga jari, sitinajai upakkeguna lao rilaleng madecengnge, sappa’I dale hallala’ta, tulungngi duwae pajajiakku, tulungngi bali-bolaku nennia sikampokku. Naikiya iyakkeppaha upakkegunai jarikku malai warangparanna tau laingnge, upakkegunai jarikku malai cengkena bali dare’ku, nennia upakkegunai jarikku peddiriwi padakku rupa tau. Maladde’ka tappasala nennia takkalupa puang.
Eee…Puang…
Sitinajaka mappedeceng lao ritau duwae pajajiakku, nasaba ale malebbina nassabari kuengka talleng rilalenna lebo’na lino. Sitinajaka turusi passuroanna, sitinajaka jampangi riwettu malasana, sitinajaka engka riseddena riwettu napparelluakku. Naikiya takkalupaka nennia tappasalaka puang, mabbali-balika rilaleng pangajana tau duwae pajajiakku, ugera-gera’I iya dua, deupogaui passuroanna, usalai riwettu malasana, mabelaka riwetuu napparelluakku. Madorakaka lao ritau duwae pajajiakku puang…nappaka massesse kale naekiya denigaga tauduwae pajajiakku puang, lisuni rionrong mannennungenna rilaleng pammaseta puang…Ee…puang tapalettukakka selleng uddanikku nennia ellau addampekku lao ritau duwae pajajiakku puang, sarekkoammengngi naddampengangi sininna dosa-dosaku lao rialena puang. Nasaba manrasa-rasaka rilino puang, temmatujungi jama-jamakku teppolei dalle masempota puang. Nakennana ada-nna tau riolota rimakkedanna :
Nigi-nigi madoraka lao ritau duwae pajajianna, makkatenningngi namarunrung, makkalleccai namaruttung, mapokka pinceng pute, mareppa lebu ittelloi, mapettu sampengngi, mapolo sangila, teccokkong temmaccolli, tennaccekkengi peppaja, temmitai parumpaja lino lebbi-lebbipa ahera.
Ee…Puang…
Narekko uwengnggerangi egana dosa pura upogau, sitongeng-tongenna deupasitinajai ale’ku mancaji tolise surugata puang. Naikiya maladde’ka matau lolonganganggi paccalatta nennia pellana apinna neraka puang. Narimakkuannanaro taddampengakka puang, tessingakka babua puang, tatarimai toba’ku puang, tapalomoi urusang linoka puang makkotoparo urusang ahera’ku puang, tapancajingekka lalekku laleng malempu pada lalenna tau ripuriota puang, Tania lalenna tau ricaccata puang. Sarekkoammnengi topada salama rilino nennia pada rilolongngengi pammasena nennia pakkamasena puang Allahu Ta’ala mati Riesso rimunrinna Insya Allah.
أللهم أرنا الحق حقا وارزقنا اتباعه , وأرنا الباطل باطلا وارزقنا اجتنابه , أللهم أصلح لنا ديننا الذي هو عصمة أمرنا , وأصلح لنا دنيانا التي فيها معاشنا , وأصلح لنا آخرتنا التي إليها معادنا , واجعل الحياة زيادة لنا في كل خير واجعل الموت راحة لنا من كل شر .
ربنا اغفر لنا ولإخواننا الذين سبقونا بالإيمان ولا تجعل في قلوبنا غلا للذين آمنوا ربنا إنك رؤوف رحيم . اللهم اغفر للمسلمين والمسلمات والمؤمنين والمؤمنات الأحياء منهم والأموات إنك أنت الغفور الرحيم . ربنا آتنا في الدنيا حسنة وفي الآخرة حسنة وقنا عذاب النار .
عباد الله !! إن الله يأمر بالعدل والإحسان وإيتاء ذى القربى وينهى عن الفحشاء والمنكر والبغي يعظكم لعلكم تذكرون . فاذكروا الله العظيم يذكركم , واشكروه على نعمه يزدكم , واسألوه من فضله يعطكم ولذكر الله الأكبر والله يعلم ما تصنعون . وأقم الصلاة إن الصلاة تنهى عن الفحشاء والمنكر .
SELESAI
